Editor's choices of Myanmar Books

ငါပြောချင်သမျှ ငါ့အကြောင်း (ဒေါက်တာသန်းထွန်း) (အတ္ထုပ္ပတ္တိ / ကိုယ်တွေ့မှတ်တမ်း)

ဆရာကြီးဒေါက်တာသန်းထွန်း အသက် ၇၈ ပြည့်ခါနီးအချိန်၌ သူ၏ ဘဝတစ်လျှောက် ရှိခဲ့သည့် အောင်မြင်ခြင်း၊ ရှုံးနိမ့်ခြင်းများကို နောင်လူနောင်သားများ သိရှိနိုင်ရန်ရည်ရွယ်ချက်ဖြင့် ဤစာအုပ်ကို ရေးသားခဲ့ခြင်း ဖြစ်သည်။ သူ့ဘဝ၊ သူ့ပညာနှင့် သူကျင်လည်ခဲ့သည့် သမိုင်းသုတေသနနယ်ပယ်မှ ဖြစ်ရပ်စုံများကို တိုရှင်းလိုရင်းမှတ်တမ်းတင် ရေးသားထားသည်။ “ငါရေးတာမှာ ကြွားတာ၊ မှားတာ၊ မမှန်တာ မပါဘူး”ဟု အမှာစာတွင် ဆိုထားသည်။

အရှေ့တောင်အာရှ နိုင်ငံများသမိုင်း (A Short History of South-East Asia) (ထင်အောင်ကျော်) (သမိုင်း)

ဘရူနိုင်း၊ ကမ္ဘောဒီယား၊ အရှေ့တီမော၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ ထိုင်း၊ ဗီယက်နမ် အစရှိသည့် အရှေ့တောင်အာရှနိုင်ငံများ၏ သမိုင်းကြောင်း၊ စီးပွားရေး၊ နိုင်ငံရေး၊ ပထဝီအနေအထား အခြေအနေများကို အခန်း (၁၁) ခန်းခွဲကာ အသေးစိတ် ရေးသားရှင်းလင်းထားသော စာအုပ်ဖြစ်သည်။

မြန်မာနိုင်ငံ၏ လူထုပညာရေး ကြိုးပမ်းဆောင်ရွက်မှုသမိုင်းကို လေ့လာတင်ပြခြင်း (၁၉၄၈ - ၂၀၀၂) (အောင်ကြည်ညွန့် (တက္ကသိုလ်)) (သမိုင်း)

၁၉၄၈ ခုနှစ်မှ ၂၀၀၂ ခုနှစ်အတွင်း မြန်မာနိုင်ငံ လူထုပညာရေး (စာတတ်မြောက်ရေး) ကြိုးပမ်းလှုပ်ရှားမှုများကို မှတ်တမ်းတင် ရေးသားထားသော စာအုပ်ဖြစ်သည်။ မြန်မာနိုင်ငံနှင့် အာရှနိုင်ငံများ စာမတတ်သူပမာဏ နှိုင်းယှဉ်ချက်၊ ကိုလိုနီခေတ် မြန်မာစာပေထွန်းကားပြန့်ပွားရေး လုပ်ဆောင်ချက်၊ သက်ကြီးပိုင်း စာမတတ်သူ ပပျောက်ရေးအတွက် တက္ကသိုလ်ကျောင်းသားများအပါအဝင် ဆရာ၊ ဆရာမ နှစ်သိန်းကျော်ဖြင့် လုပ်ဆောင်ခဲ့သည့် “အ” သုံးလုံးသင်တန်းများအကြောင်း၊ ၎င်းအပြင် စာတတ်မြောက်ရေးနှင့် ပတ်သက်၍ ခေတ်အဆက်ဆက် ကြိုးပမ်းဆောင်ရွက်မှုများ၊ လူထုကို မည်သို့ စည်းရုံးလှုံ့ဆော်ခဲ့ပုံ၊ သက်ကြီးများကို စာသင်ရာတွင် ချဉ်းကပ်ပုံနှင့် သင်ကြားနည်းစနစ်၊ “အ” သုံးလုံးသင်တန်းနှင့် ပတ်သက်သည့် ‘ဘယ်သူပြိုင်လို့ လှပါတော့နိုင်’ ဇာတ်ကားကြီး ဖြစ်ပေါ်လာပုံ၊ ထိုသို့လုပ်ဆောင်မှုများကြောင့် ယူနက်စကိုမှ ချီးမြှင့်သည့် မိုဟာမက်ရေဇာပါလာဗီဆုနှင့် နိုမာဆုများကို လက်ခံရရှိခဲ့ပုံများကို စာအုပ်တွင် အသေးစိတ် မှတ်တမ်းတင် ရေးသားထားသည်။

မြန်မာ့အကြိုသမိုင်း (ဒေါက်တာတိုးလှ (သမိုင်းပါမောက္ခ (ငြိမ်း))) (သမိုင်း)

မြန်မာရာဇဝင်တွင် ပျူတို့မတိုင်မီခေတ်သမိုင်းကို ရှေးယခင်က မသိရှိကြဘဲ အမေရိကန်နိုင်ငံမှ ဘူမိဗေဒပညာရှင်များ၊ မြန်မာ့ရှေးဟောင်းသုတေသနပညာရှင်များ၊ မနုဿဗေဒပညာရှင်များနှင့် မြန်မာ့သမိုင်းပညာရှင်များက မြေပေါ်မြေအောက်အထောက်အထားများ အကူအညီဖြင့် စုပေါင်းကြိုးပမ်းခဲ့ကြသဖြင့် ယခုအခါ သိရှိလာကြပြီဖြစ်သည်။ ယခုစာအုပ်တွင် ထိုလေ့လာတွေ့ရှိချက်များကို အခန်း (၆) ခန်းခွဲ၍ အထောက်အထားဓာတ်ပုံများနှင့်အတူ မှတ်တမ်းတင် ရေးသားထားခြင်း ဖြစ်သည်။

ဆရာကျကျ ဘဝနေနည်း (ဇေရတု) (သုတစာပေ)

Robert Greene ရေးသားသည့် The Concise Mastery (The Robert Greene Collection) စာအုပ်ကို ဘာသာပြန်ဆိုထားခြင်း ဖြစ်သည်။ အာရုံကြောသိပ္ပံ (Neuro Science) နှင့် သိမြင်မှုဆိုင်ရာသိပ္ပံ (Cognitive Science) နယ်ပယ်များမှ သုတေသနပြုချက်များ၊ ဖန်တီးနိုင်စွမ်းနှင့် ပတ်သက်သည့် လေ့လာတွေ့ရှိချက်များ၊ ပညာရှင်များ၏ အတ္ထုပ္ပတ္တိများ၊ တွေ့ဆုံမေးမြန်းမှုများပေါ် အခြေခံ၍ ရေးသားထားသော စာအုပ်ဖြစ်သည်။ လူတစ်ဦးချင်းစီတွင် ရှိပြီးသား စွမ်းရည်များကို အသုံးချပြီး မိမိနယ်ပယ်တွင် အထွဋ်အထိပ်သို့ ရောက်ရှိစေရန် လိုက်နာရမည့် လမ်းညွှန်ချက်များကို စာအုပ်တွင် ဖတ်ရှုကြရမည် ဖြစ်သည်။

ကြီးမြတ်သူ ခေါင်းဆောင်ကြီးတွေ ပြောပြတဲ့ ပုံပြင် ၁၀ ပုဒ် (ကောင်းသာ) (စီမံခန့်ခွဲမှု)

Paul Smith ရေးသားသည့် The 10 Stories Great Leaders Tell စာအုပ်ကို ဘာသာပြန်ဆိုထားခြင်း ဖြစ်သည်။ ခေါင်းဆောင်တစ်ဦးအနေဖြင့် မိမိ၏အဖွဲ့အစည်း သို့မဟုတ် နောက်လိုက်များကို စိတ်အားတက်ကြွစေရန်နှင့် လမ်းညွှန်မှုပေးရန်အတွက် လက်နက်တစ်ခုကဲ့သို့ အသုံးချသင့်သည့် ပုံပြင် (၁၀) ပုဒ်ကို စာအုပ်တွင် ဖတ်ရှုလေ့လာကြရမည် ဖြစ်သည်။

ဉာဏ်ကြီးရှင်များ၏ သိပ္ပံသဘာဝ (ဒေါက်တာမြင့်သန်း (ညောင်လေးပင်)) (အတ္ထုပ္ပတ္တိ / ကိုယ်တွေ့မှတ်တမ်း)

မိုက်ကယ်အင်ဂျလို၊ အရစ်စ်တိုတယ်၊ ဗီသိုဗင်၊ ချားစ်ဒါဝင်၊ နယူတန်၊ အိုင်းစတိုင်း၊ စတိဗ်ဂျော့၊ ဘေးလ်ဂိတ် အပါအဝင် စာပေ၊ အနုပညာ၊ သိပ္ပံနယ်ပယ်စုံတို့တွင် ထူးချွန်ထက်မြက်ခဲ့ကြပြီး ကမ္ဘာ့လူသားတို့၏ လူမှုစီးပွားဘဝများကို ပြောင်းလဲစေခဲ့သူများအကြောင်း၊ သူတို့၏ ဉာဏ်ရည်ဉာဏ်သွေး၊ အထုံပါရမီ၊ ထိပ်ဆုံးရောက်အောင် ပတ်ဝန်းကျင်ကောင်းများက မည်သို့ထောက်ပံ့ခဲ့ကြပုံများ၊ အိုင်းစတိုင်းကွယ်လွန်ပြီးနောက် သူ့ဦးနှောက်ကို ခွဲစိတ်သုတေသနပြုတွေ့ရှိချက် အစရှိသည်တို့ကို သိပ္ပံနည်းကျလေ့လာတွေ့ရှိချက်များနှင့်အတူ အခန်း (၉) ခန်းခွဲ၍ ရေးသားရှင်းလင်းထားခြင်း ဖြစ်သည်။

SME လုပ်ငန်းရှင်များအတွက် မဟာဗျူဟာကျသော စီမံကိန်းရေးဆွဲခြင်း လမ်းညွှန် (Strategic Planning Guidebook) (မောင်သက်နောင်) (စီမံခန့်ခွဲမှု)

အသေးစား၊ အလတ်စား လုပ်ငန်းရှင်များ၏ အတွေ့အကြုံကို အခြေခံရေးသားထားသည့် ဤစာအုပ်တွင် အောင်မြင်သည့် စီးပွားရေးလုပ်ငန်းတစ်ခု အစပြုရန် သိရှိထားရမည့် KSA နည်းစနစ်အကြောင်း၊ လုပ်ငန်းအနာဂတ်ကို ရှင်းလင်းစွာမြင်ကာ မိမိလုပ်ငန်းအားသာချက်ကို ဖန်တီးနိုင်စေရန်၊ ရေရှည် တည်တံ့ခိုင်မြဲသော တိုးတက်မှု ရရှိရန် သိရှိထားရမည့် အကြောင်းအရာများ၊ လုပ်ငန်းအတွက် အရေးကြီးသော မဟာဗျူဟာစီမံကိန်းများ ချမှတ်ပုံ, အကောင်အထည်ဖော်ပုံနှင့် စောင့်ကြည့်အကဲဖြတ်ပုံများကို လက်တွေ့ကျသော နည်းလမ်းများနှင့်အတူ ရှင်းလင်းရေးသားထားသည်။

ကျော်ဖြတ်ခဲ့သော တောင်တန်းများ (သေးသေးလေးတွေ) ခံစားမှုစာစုများ (ရာသက်ပန် (တောင်ငူဆောင်)) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

မြန်မာနိုင်ငံအနှံ့ တက္ကသိုလ်များတွင် တာဝန်ထမ်းဆောင်ခဲ့ပြီး ယခုအခါ စာပေရေးသားခြင်းဖြင့် ရပ်တည်လျက်ရှိသူ စာရေးသူက သူ၏ ဘဝအတွေ့အကြုံဆောင်းပါးများ၊ တက္ကသိုလ်လုပ်ငန်းခွင် အမှတ်တရဆောင်းပါစးများ၊ ခရီးသွားဆောင်းပါးများကို စုစည်း၍ စာအုပ်အဖြစ် ထုတ်ဝေထားခြင်း ဖြစ်သည်။

အတားအဆီးမဲ့၊ အနှိုင်းအဆမဲ့၊ အကန့်အသတ်မဲ့ Unlimited (There is no limit to your becoming) (မွန်ဟော်စီ (Mon Halsey), Min Hla (SPM)) (သုတစာပေ)

Unlimited ဆိုသည်မှာ အတားအဆီးမဲ့၊ အနှိုင်းအဆမဲ့၊ အကန့်အသတ်မဲ့ စွမ်းအားကိုဆိုလိုရင်း ဖြစ်သည်။ ဘဝတွင် အကန့်အသတ်ဟု ထင်ထားသည့်အရာများရှိသော်လည်း အချိန်မရွေး အသစ်က ပြန်စ၍ ရနိုင်သလို ပြောင်းလဲ၍ ရနိုင်ပုံ၊ ထိုအကန့်အသတ်များသည် ကြောက်ရွံ့မှု၊ အရှက်တရား၊ သံသယများဖြစ်လာကြပြီး ဘဝတက်လမ်းကို ကားဆီးပိတ်ဆို့နေတတ်ပုံ၊ ၎င်းတို့ကို ဖောက်ထွက်နိုင်ရန် ဖတ်ရှုသင့်သည့်များနှင့် ပေးလိုသည့် စိတ်ခွန်အားများကို စာအုပ်တွင် ဖတ်ရှုကြရမည် ဖြစ်သည်။