New Arrivals of Myanmar Books

ငါပြောချင်သမျှ ငါ့အကြောင်း (ဒေါက်တာသန်းထွန်း) (အတ္ထုပ္ပတ္တိ / ကိုယ်တွေ့မှတ်တမ်း)

ဆရာကြီးဒေါက်တာသန်းထွန်း အသက် ၇၈ ပြည့်ခါနီးအချိန်၌ သူ၏ ဘဝတစ်လျှောက် ရှိခဲ့သည့် အောင်မြင်ခြင်း၊ ရှုံးနိမ့်ခြင်းများကို နောင်လူနောင်သားများ သိရှိနိုင်ရန်ရည်ရွယ်ချက်ဖြင့် ဤစာအုပ်ကို ရေးသားခဲ့ခြင်း ဖြစ်သည်။ သူ့ဘဝ၊ သူ့ပညာနှင့် သူကျင်လည်ခဲ့သည့် သမိုင်းသုတေသနနယ်ပယ်မှ ဖြစ်ရပ်စုံများကို တိုရှင်းလိုရင်းမှတ်တမ်းတင် ရေးသားထားသည်။ “ငါရေးတာမှာ ကြွားတာ၊ မှားတာ၊ မမှန်တာ မပါဘူး”ဟု အမှာစာတွင် ဆိုထားသည်။

အရှေ့တောင်အာရှ နိုင်ငံများသမိုင်း (A Short History of South-East Asia) (ထင်အောင်ကျော်) (သမိုင်း)

ဘရူနိုင်း၊ ကမ္ဘောဒီယား၊ အရှေ့တီမော၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ ထိုင်း၊ ဗီယက်နမ် အစရှိသည့် အရှေ့တောင်အာရှနိုင်ငံများ၏ သမိုင်းကြောင်း၊ စီးပွားရေး၊ နိုင်ငံရေး၊ ပထဝီအနေအထား အခြေအနေများကို အခန်း (၁၁) ခန်းခွဲကာ အသေးစိတ် ရေးသားရှင်းလင်းထားသော စာအုပ်ဖြစ်သည်။

စကားတောင်းစား (ပန်းချီမြတ်နိုး) (ရုပ်ပြ / ကာတွန်း)

စကားလည်းကြွယ်၊ ဟာသဉာဏ်လည်းကောင်းသော အင်းဝခေတ်မှ အမတ်တစ်ဦး၏ စကားပညာပုံပြင်များကို လူငယ်များ သိရှိနိုင်စေရန် ရည်ရွယ်၍ ရုပ်ပြဇာတ်လမ်းအဖြစ် ရေးဆွဲထားခြင်း ဖြစ်သည်။

လူငယ်လမ်းညွှန်စာစုများ (အတွဲ ၁) (ကောင်းစံသာ (ရေကြည်)) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

စာရေးသူ ရေးသားသည့် လူငယ်အထူးပြုဆောင်းပါး (၁၅) ပုဒ် စုစည်းမှု စာအုပ်ဖြစ်သည်။

ပလောင်ပုံပြင်များ (အတွဲ ၂) (လူထုဦးလှ) (ကလေးစာပေ)

မြန်မာလူမျိုးများ နှစ်ခြိုက်ခုံမင်စွာ စားသုံးကြသည့် လက်ဖက်ကို အဓိကစိုက်ပျိုးကြသော ပလောင်လူမျိုးများ၏ ရိုးရာပုံပြင် (၃၈) ပုဒ် စုစည်းမှု စာအုပ်ဖြစ်သည်။

ဆံတော်ရှင် ကျိုက်ထီးရိုး စေတီတော်မြတ်ကြီး ဘုရားသမိုင်း (ပန်းချီကံကောင်း) (ရုပ်ပြ / ကာတွန်း)

နှစ်ပေါင်း (၂၄ဝဝ) ကျော် သက်တမ်းရှိပြီး ပင်လယ်ရေမျက်နှာပြင်အထက် ပေပေါင်း (၃၆၁၅) တွင်ရှိကာ အောက်မှ သို့မဟုတ် ဘေးတိုက်ကြည့်က ပြုတ်ကျမည့်ဟန်၊ ပြိုမည့်အလားဖြစ်ပေါ်နေသော်လည်း အံ့ဖွယ်ဆန်းကြယ်စွာတည်ရှိနေသည့် ဆံတော်ရှင် ကျိုက်ထီးရိုး စေတီတော်မြတ်ကြီး၏ ဘုရားသမိုင်းကို ရုပ်ပြဇာတ်လမ်းအဖြစ် ရေးဆွဲထားခြင်း ဖြစ်သည်။

ဖမ်းဆုပ်ခြင်းနှင့် လက်လွှတ်ခြင်း (Catch and Release) (သားထွေး (Thar Htwe)) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

ဘဝတွင် အရာရာသည် စိန်ခေါ်ခြင်းများ၊ ဒွိဟများ၊ တွေဝေခြင်းများနှင့် ကြုံတွေ့ရလေ့ရာ မည်သည်ကို ဆက်လက်သယ်ဆောင်မည်၊ မည်သည်ကို လက်လွှတ်ရမည်၊ ပြုပြင်ပြောင်းလဲရမည့် အမူအကျင့်များ၊ မွေးမြူထိန်းသိမ်းရမည့် စိတ်နေသဘောထားများ၊ လိုက်နာကျင့်သုံးရမည့်အကြောင်းအရာများကို ဤစာအုပ်တွင် လမ်းညွှန်ရေးသားထားသည်။

မြန်မာနိုင်ငံ၏ လူထုပညာရေး ကြိုးပမ်းဆောင်ရွက်မှုသမိုင်းကို လေ့လာတင်ပြခြင်း (၁၉၄၈ - ၂၀၀၂) (အောင်ကြည်ညွန့် (တက္ကသိုလ်)) (သမိုင်း)

၁၉၄၈ ခုနှစ်မှ ၂၀၀၂ ခုနှစ်အတွင်း မြန်မာနိုင်ငံ လူထုပညာရေး (စာတတ်မြောက်ရေး) ကြိုးပမ်းလှုပ်ရှားမှုများကို မှတ်တမ်းတင် ရေးသားထားသော စာအုပ်ဖြစ်သည်။ မြန်မာနိုင်ငံနှင့် အာရှနိုင်ငံများ စာမတတ်သူပမာဏ နှိုင်းယှဉ်ချက်၊ ကိုလိုနီခေတ် မြန်မာစာပေထွန်းကားပြန့်ပွားရေး လုပ်ဆောင်ချက်၊ သက်ကြီးပိုင်း စာမတတ်သူ ပပျောက်ရေးအတွက် တက္ကသိုလ်ကျောင်းသားများအပါအဝင် ဆရာ၊ ဆရာမ နှစ်သိန်းကျော်ဖြင့် လုပ်ဆောင်ခဲ့သည့် “အ” သုံးလုံးသင်တန်းများအကြောင်း၊ ၎င်းအပြင် စာတတ်မြောက်ရေးနှင့် ပတ်သက်၍ ခေတ်အဆက်ဆက် ကြိုးပမ်းဆောင်ရွက်မှုများ၊ လူထုကို မည်သို့ စည်းရုံးလှုံ့ဆော်ခဲ့ပုံ၊ သက်ကြီးများကို စာသင်ရာတွင် ချဉ်းကပ်ပုံနှင့် သင်ကြားနည်းစနစ်၊ “အ” သုံးလုံးသင်တန်းနှင့် ပတ်သက်သည့် ‘ဘယ်သူပြိုင်လို့ လှပါတော့နိုင်’ ဇာတ်ကားကြီး ဖြစ်ပေါ်လာပုံ၊ ထိုသို့လုပ်ဆောင်မှုများကြောင့် ယူနက်စကိုမှ ချီးမြှင့်သည့် မိုဟာမက်ရေဇာပါလာဗီဆုနှင့် နိုမာဆုများကို လက်ခံရရှိခဲ့ပုံများကို စာအုပ်တွင် အသေးစိတ် မှတ်တမ်းတင် ရေးသားထားသည်။

မြန်မာ့အကြိုသမိုင်း (ဒေါက်တာတိုးလှ (သမိုင်းပါမောက္ခ (ငြိမ်း))) (သမိုင်း)

မြန်မာရာဇဝင်တွင် ပျူတို့မတိုင်မီခေတ်သမိုင်းကို ရှေးယခင်က မသိရှိကြဘဲ အမေရိကန်နိုင်ငံမှ ဘူမိဗေဒပညာရှင်များ၊ မြန်မာ့ရှေးဟောင်းသုတေသနပညာရှင်များ၊ မနုဿဗေဒပညာရှင်များနှင့် မြန်မာ့သမိုင်းပညာရှင်များက မြေပေါ်မြေအောက်အထောက်အထားများ အကူအညီဖြင့် စုပေါင်းကြိုးပမ်းခဲ့ကြသဖြင့် ယခုအခါ သိရှိလာကြပြီဖြစ်သည်။ ယခုစာအုပ်တွင် ထိုလေ့လာတွေ့ရှိချက်များကို အခန်း (၆) ခန်းခွဲ၍ အထောက်အထားဓာတ်ပုံများနှင့်အတူ မှတ်တမ်းတင် ရေးသားထားခြင်း ဖြစ်သည်။

ဆရာကျကျ ဘဝနေနည်း (ဇေရတု) (သုတစာပေ)

Robert Greene ရေးသားသည့် The Concise Mastery (The Robert Greene Collection) စာအုပ်ကို ဘာသာပြန်ဆိုထားခြင်း ဖြစ်သည်။ အာရုံကြောသိပ္ပံ (Neuro Science) နှင့် သိမြင်မှုဆိုင်ရာသိပ္ပံ (Cognitive Science) နယ်ပယ်များမှ သုတေသနပြုချက်များ၊ ဖန်တီးနိုင်စွမ်းနှင့် ပတ်သက်သည့် လေ့လာတွေ့ရှိချက်များ၊ ပညာရှင်များ၏ အတ္ထုပ္ပတ္တိများ၊ တွေ့ဆုံမေးမြန်းမှုများပေါ် အခြေခံ၍ ရေးသားထားသော စာအုပ်ဖြစ်သည်။ လူတစ်ဦးချင်းစီတွင် ရှိပြီးသား စွမ်းရည်များကို အသုံးချပြီး မိမိနယ်ပယ်တွင် အထွဋ်အထိပ်သို့ ရောက်ရှိစေရန် လိုက်နာရမည့် လမ်းညွှန်ချက်များကို စာအုပ်တွင် ဖတ်ရှုကြရမည် ဖြစ်သည်။